শ্রীকালিদাস বিরচিত সকল জননী স্তবঃ

সকল জননী স্তবঃ

অজান্তো যান্তি ক্ষয়মবশমন্যোন্যকলহৈ-
-রমী মায়াগ্রংথৌ তব পরিলুঠংতঃ সময়িনঃ ।
জগন্মাতর্জন্মজ্বরভয়তমঃ কৌমুদি বয়ং
নমস্তে কুর্বাণাঃ শরণমুপয়ামো ভগবতীম্ ॥ ১ ॥

বচস্তর্কাগম্যস্বরসপরমানংদবিভব-
-প্রবোধাকারায় দ্য়ুতিতুলিতনীলোত্পলরুচে ।
শিবাদ্যারাধ্য়ায় স্তনভরবিনম্রায় সততং
নমস্তস্মৈ কস্মৈচন ভবতু মুগ্ধায় মহসে ॥ ২ ॥

অনাদ্যংতাভেদপ্রণয়রসিকাপি প্রণয়িনী
শিবস্যাসীর্যত্ত্বং পরিণয়বিধৌ দেবি গৃহিণী ।
সবিত্রী ভূতানামপি যদুদভূঃ শৈলতনয়া
তদেতত্সংসারপ্রণয়নমহানাটকমুখম্ ॥ ৩॥

ব্রুবংত্য়েকে তত্ত্বং ভগবতি সদন্যে বিদুরস-
-তৎপরে মাতঃ প্রাহুস্তব সদসদন্যে সুকবয়ঃ ।
পরে নৈতৎসর্বং সমভিদধতে দেবি সুধিয়-
-স্তদেতত্ত্বন্মায়াবিলসিতমশেষং ননু শিবে ॥ ৪ ॥

লুঠদ্গুংজাহারস্তনভরনমন্মধ্যলতিকা-
-মুদংচদ্ধর্মাংভঃ কণগুণিতবক্ত্রাংবুজরুচম্ ।
শিবং পার্থত্রাণপ্রবণমৃগয়াকারগুণিতং
শিবামন্বগ্যাংতীং শরণমহমন্বেমি শবরীম্ ॥ ৫॥

মিথঃ কেশাকেশিপ্রথননিধনাস্তর্কঘটনাঃ
বহুশ্রদ্ধাভক্তিপ্রণতিবিষয়াঃ শাস্ত্রবিধয়ঃ ।
প্রসীদ প্রত্যক্ষীভব গিরিসুতে দেহি শরণং
নিরালংবং চেতঃ পরিলুঠতি পারিপ্লবমিদম্ ॥ ৬ ॥

শুনাং বা বহ্নের্বা খগপরিষদো বা যদশনং
কদা কেন ক্বেতি ক্বচিদপি ন কশ্চিত্কলয়তি ।
অমুষ্মিন্বিশ্বাসং বিজহিহি মমাহ্নায় বপুষি
প্রপদ্যেথাশ্চেতঃ সকলজননীমেব শরণম্ ॥ ৭ ॥

তটিৎকোটিজ্য়োতির্দ্য়ুতিদলিতষড়গ্রংথিগহনং
প্রবিষ্টং স্বাধারং পুনরপি সুধাবৃষ্টিবপুষা ।
কিমপ্যষ্টাবিংশত্কিরণসকলীভূতমনিশং
ভজে ধাম শ্যামং কুচভরনতং বর্বরকচম্ ॥ ৮ ॥

চতুষ্পত্রাংতঃ ষড়দলপুটভগাংতস্ত্রিবলয়-
-স্ফুরদ্বিদ্য়ুদ্বহ্নিদ্য়ুমণিনিয়ুতাভদ্যুতিলতে ।
ষড়শ্রং ভিত্ত্বাদৌ দশদলমথ দ্বাদশদলং
কলাশ্রং চ দ্ব্যশ্রং গতবতি নমস্তে গিরিসুতে ॥ ৯ ॥

কুলং কেচিত্প্রাহুর্বপুরকুলমন্যে তব বুধাঃ
পরে তৎসংভেদং সমভিদধতে কৌলমপরে ।
চতুর্ণামপ্যেষামুপরি কিমপি প্রাহুরপরে
মহামায়ে তত্ত্বং তব কথমমী নিশ্চিনুমহে ॥ ১০ ॥

ষড়ধ্বারণ্যানীং প্রলয়রবিকোটিপ্রতিরুচা
রুচা ভস্মীকৃত্য স্বপদকমলপ্রহ্বশিরসাম্ ।
বিতন্বানঃ শৈবং কিমপি বপুরিংদীবররুচিঃ
কুচাভ্যামানম্রস্তব পুরুষকারো বিজয়তে ॥ ১১॥

প্রকাশানংদাভ্যামবিদিতচরীং মধ্যপদবীং
প্রবিশ্যৈতদ্দ্বংদ্বং রবিশশিসমাখ্য়ং কবলয়ন্ ।
প্রপদ্যের্ধ্বং নাদং লয়দহনভস্মীকৃতকুলঃ
প্রসাদাত্তে জংতুঃ শিবমকুলমংব প্রবিশতি ॥ ১২॥

মনুষ্যাস্তির্য়ংচো মরুত ইতি লোকত্রয়মিদং
ভবাংভোধৌ মগ্নং ত্রিগুণলহরীকোটিলুঠিতম্ ।
কটাক্ষশ্চেদ্যত্র ক্বচন তব মাতঃ করুণয়া
শরীরী সদ্যোঽয়ং ব্রজতি পরমানংদতনুতাম্ ॥ ১৩॥

প্রিয়ংগুশ্যামাংগীমরুণতরবাসং কিসলয়াং
সমুন্মীলন্মুক্তাফলবহলনেপথ্যসুভগাম্ ।
স্তনদ্বংদ্বস্ফারস্তবকনমিতাং কল্পলতিকাং
সকৃদ্ধ্য়ায়ংতস্ত্বাং দধতি শিবচিংতামণিপদম্ ॥ ১৪ ॥

ষড়াধারাবর্তৈরপরিমিতমংত্রোর্মিপটলৈঃ
লসন্মুদ্রাফেনৈর্বহুবিধলসদ্দৈবতঝষৈঃ ।
ক্রমস্রোতোভিস্ত্বং বহসি পরনাদামৃতনদী
ভবানি প্রত্যগ্রা শিবচিদমৃতাব্ধিপ্রণয়িনী ॥ ১৫ ॥

মহীপাথোবহ্নিশ্বসনবিযদাত্মেংদুরবিভি-
-র্বপুর্ভিগ্রস্তাশৈরপি তব কিয়ানংব মহিমা ।
অমূন্য়ালোক্যংতে ভগবতি ন কুত্রাপ্যণুতমা-
-মবস্থাং প্রাপ্তানি ত্বয়ি তু পরমব্যোমবপুষি ॥ ১৬॥

কলামাজ্ঞাং প্রজ্ঞাং সময়মনুভূতিং সমরসং
গুরুং পারংপর্য়ং বিনয়মুপদেশং শিবপদম্ ।
প্রমাণং নির্বাণং প্রকৃতিমভিভূতিং পরগুহাং
বিধিং বিদ্যামাহুঃ সকলজননীমেব মুনয়ঃ ॥ ১৭ ॥

প্রলীনে শব্দৌঘে তদনু বিরতে বিংদুবিভবে
ততস্তত্ত্বে চাষ্টধ্বনিভিরনপায়িন্যধিগতে ।
শ্রিতে শাক্তে পর্বণ্যনুকলিতচিন্মাত্র গহনাং
স্বসংবিত্তিং যোগী রসযতি শিবাখ্য়াং ভগবতীম্ ॥ ১৮॥

পরানংদাকারাং নিরবধিশিবৈশ্বর্যবপুষং
নিরাকারাং জ্ঞানপ্রকৃতিমপরিচ্ছিন্নকরুণাম্ ।
সবিত্রীং লোকানাং নিরতিশয়ধামাস্পদপদাং
ভবো বা মোক্ষো বা ভবতু ভবতীমেব ভজতাম্ ॥ ১৯॥

জগৎকায়ে কৃত্বা তদপি হৃদয়ে তচ্চ পুরুষে
পুমাংসং বিংদুস্থং তদপি বিযদাখ্য়ে চ গহনে ।
তদেতদ্জ্ঞানাখ্য়ে তদপি পরমানংদগহনে
মহাব্য়োমাকারে ত্বদনুভবশীলো বিজয়তে ॥ ২০॥

বিধে বেদ্যে বিদ্য়ে বিবিধসময়ে বেদগুলিকে
বিচিত্রে বিশ্বাদ্যে বিনয়সুলভে বেদজননি ।
শিবজ্ঞে শূলস্থে শিবপদবদান্যে শিবনিধে
শিবে মাতর্মহ্য়ং ত্বয়ি বিতর ভক্তিং নিরুপমাম্ ॥২১॥

বিধের্মুংডং হৃত্বা যদকুরুত পাত্রং করতলে
হরিং শূলপ্রোতং যদগমযদংসাভরণতাম্ ।
অলংচক্রে কংঠং যদপি গরলেনাংব গিরিশঃ
শিবস্থায়াঃ শক্তেস্তদিদমখিলং তে বিলসিতম্ ॥ ২২ ॥

বিরিংচ্যাখ্য়া মাতঃ সৃজসি হরিসংজ্ঞা ত্বমবসি
ত্রিলোকীং রুদ্রাখ্য়া হরসি বিদধাসীশ্বরদশাম্ ।
ভবংতী নাদাখ্য়া বিহরসি চ পাশৌঘদলনী
ত্বমেবৈকাঽনেকা ভবসি কৃতিভেদৈর্গিরিসুতে ॥ ২৩॥

মুনীনাং চেতোভিঃ প্রমৃদিতকষায়ৈরপি মনা-
-গশক্যং সংস্প্রষ্টুং চকিতচকিতৈরংব সততম্ ।
শ্রুতীনাং মূর্ধানঃ প্রকৃতিকঠিনাঃ কোমলতরে
কথং তে বিংদংতে পদকিসলয়ে পার্বতি পদম্ ॥ ২৪ ॥

তটিদ্বল্লীং নিত্য়ামমৃতসরিতং পাররহিতাং
মলোত্তীর্ণাং জ্য়োত্স্নাং প্রকৃতিমগুণগ্রংথিগহনাম্ ।
গিরাং দূরাং বিদ্যামবিনতকুচাং বিশ্বজননী-
-মপর্য়ংতাং লক্ষ্মীমভিদধতি সংতো ভগবতীম্ ॥ ২৫॥

শরীরং ক্ষিত্য়ংভঃ প্রভৃতিরচিতং কেবলমচিত্
সুখং দুঃখং চায়ং কলযতি পুমাংশ্চেতন ইতি ।
স্ফুটং জানানোঽপি প্রভবতি ন দেহী রহয়িতুং
শরীরাহংকারং তব সমযবাহ্য়ো গিরিসুতে ॥ ২৬॥

পিতা মাতা ভ্রাতা সুহৃদনুচরঃ সদ্ম গৃহিণী
বপুঃ ক্ষেত্রং মিত্রং ধনমপি যদা মাং বিজহতি ।
তদা মে ভিংদানা সপদি ভযমোহাংধতমসং
মহাজ্য়োত্স্নে মাতর্ভব করুণয়া সন্নিধিকরী ॥ ২৭ ॥

সুতা দক্ষস্যাদৌ কিল সকলমাতস্ত্বমুদভূঃ
সদোষং তং হিত্বা তদনু গিরিরাজস্য দুহিতা ।
অনাদ্যংতা শংভোরপৃথগপি শক্তির্ভগবতী
বিবাহাজ্জায়াসীত্যহহ চরিতং বেত্তি তব কঃ ॥ ২৮ ॥

কণাস্ত্বদ্দীপ্তীনাং রবিশশিকৃশানুপ্রভৃতয়ঃ
পরং ব্রহ্ম ক্ষুদ্রং তব নিয়তমানংদকণিকা ।
শিবাদি ক্ষিত্য়ংতং ত্রিবলযতনোঃ সর্বমুদরে
তবাস্তে ভক্তস্য় স্ফুরসি হৃদি চিত্রং ভগবতি ॥ ২৯॥

পুরঃ পশ্চাদংতর্বহিরপরিমেয়ং পরিমিতং
পরং স্থূলং সূক্ষ্মং সকলমকুলং গুহ্যমগুহম্ ।
দবীয়ো নেদীয়ঃ সদসদিতি বিশ্বং ভগবতী
সদা পশ্যংত্য়াখ্য়াং বহসি ভুবনক্ষোভজননীম্ ॥ ৩০

প্রবিশ্য ত্বন্মার্গং সহজদযয়া দেশিকদৃশা
ষডধ্বধ্বাংতৌঘচ্ছিদুরগণনাতীতকরুণাম্ ।
পরামাজ্ঞাকারাং সপদি শিবয়ংতীং শিবতনুং
স্বমাত্মানং ধন্যাশ্চিরমুপলভংতে ভগবতীম্ ॥ ৩১॥

ময়ূখাঃ পূষ্ণীব জ্বলন ইব তদ্দীপ্তিকণিকাঃ
পয়োধৌ কল্লোলাঃ প্রতিহতমহিম্নীব পৃষতঃ ।
উদেত্য়োদেত্য়াংব ত্বয়ি সহ নিজৈঃ সাত্ত্বিকগুণৈ-
-র্ভজংতে তত্ত্বৌঘাঃ প্রশমমনুকল্পং পরবশাঃ ॥ ৩২॥

বিধুর্বিষ্ণুর্ব্রহ্মা প্রকৃতিরণুরাত্মা দিনকরঃ
স্বভাবো জৈনেংদ্রঃ সুগতমুনিরাকাশমলিনঃ ।
শিবঃ শক্তিশ্চেতি শ্রুতিবিষযতাং তামুপগতাং
বিকল্পৈরেভিস্ত্বামভিদধতি সংতো ভগবতীম্ ॥ ৩৩॥

শিবস্ত্বং শক্তিস্ত্বং ত্বমসি সময়া ত্বং সময়িনী
ত্বমাত্মা ত্বং দীক্ষা ত্বমযমণিমাদির্গুণগণঃ ।
অবিদ্য়া ত্বং বিদ্য়া ত্বমসি নিখিলং ত্বং কিমপরং
পৃথক্তত্ত্বং ত্বত্তো ভগবতি ন বীক্ষামহ ইমে ॥ ৩৪॥

ত্বয়াসৌ জানীতে রচয়তি ভবত্য়ৈব সততং
ত্বয়ৈবেচ্ছত্য়ংব ত্বমসি নিখিলা যস্য তনবঃ ।
জগত্সাম্য়ং শংভোর্বহসি পরমব্যেমবপুষঃ
তথাপ্যর্ধং ভূত্বা বিহরসি শিবস্য়েতি কিমিদম্ ॥ ৩৫॥

অসংখ্য়ৈঃ প্রাচীনৈর্জননি জননৈঃ কর্মবিলয়া-
-ত্সকৃজ্জন্মন্য়ংতে গুরুবপুষমাসাদ্য় গিরিশম্ ।
অবাপ্য়াজ্ঞাং শৈবীং শিবতনুমপি ত্বাং বিদিতবা-
-ন্নয়েয়ং ত্বত্পূজাস্তুতিবিরচনেনৈব দিবসান্ ॥ ৩৬॥

যত্ষট্পত্রং কমলমুদিতং তস্য যা কর্ণিকাখ্য়া
যোনিস্তস্যাঃ প্রথিতমুদরে যত্তদোংকারপীঠম্ ।
তস্য়াপ্যংতঃ কুচভরনতাং কুংডলীতি প্রসিদ্ধাং
শ্যামাকারাং সকলজননীং সংততং ভাবয়ামি ॥ ৩৭ ॥

ভুবি পয়সি কৃশানৌ মারুতে খে শশাংকে
সবিতরি যজমানেঽপ্যষ্টধা শক্তিরেকা ।
বহসি কুচভরাভ্য়াং যাবনম্রাপি বিশ্বং
সকলজননি সা ত্বং পাহি মামিত্যবাচ্যম্ ॥ ৩৮ ॥

। ইতি শ্রীকালিদাস বিরচিত পঞ্চস্তব্যাং পঞ্চমঃ সকলজননীস্তবঃ ।।