ধাতা
ধাতা কৃতস্থলী হেতির্বাসুকী রথকৃন্মুনে ।
পুলস্ত্যস্তুংবুরুরিতি মধুমাসং নযংত্যমী ॥
ধাতা শুভস্য মে দাতা ভূযো ভূযোঽপি ভূযসঃ ।
রশ্মিজালসমাশ্লিষ্টঃ তমস্তোমবিনাশনঃ ॥
অর্যম্
অর্যমা পুলহোঽথৌজাঃ প্রহেতি পুংজিকস্থলী ।
নারদঃ কচ্ছনীরশ্চ নযংত্যেতে স্ম মাধবম্ ॥
মেরুশৃংগাংতরচরঃ কমলাকরবাংধবঃ ।
অর্যমা তু সদা ভূত্যৈ ভূযস্যৈ প্রণতস্য মে ॥
মিত্রঃ
মিত্রোঽত্রিঃ পৌরুষেযোঽথ তক্ষকো মেনকা হহঃ
রথস্বন ইতি হ্যেতে শুক্রমাসং নযংত্যমী ॥
নিশানিবারণপটুঃ উদযাদ্রিকৃতাশ্রযঃ ।
মিত্রোঽস্তু মম মোদায তমস্তোমবিনাশনঃ ॥
বরুণঃ
বসিষ্ঠো হ্যরুণো রংভা সহজন্যস্তথা হুহুঃ ।
শুক্রশ্চিত্রস্বনশ্চৈব শুচিমাসং নযংত্যমী ॥
সূর্যস্যংদনমারূঢ অর্চির্মালী প্রতাপবান্ ।
কালভূতঃ কামরূপো হ্যরুণঃ সেব্যতে মযা ॥
ইংদ্রঃ
ইংদ্রো বিশ্বাবসুঃ শ্রোতা এলাপত্রস্তথাঽংগিরাঃ ।
প্রম্লোচা রাক্ষসোবর্যো নভোমাসং নযংত্যমী ॥
সহস্ররশ্মিসংবীতং ইংদ্রং বরদমাশ্রযে ।
শিরসা প্রণমাম্যদ্য শ্রেযো বৃদ্ধিপ্রদাযকম্ ॥
বিবস্বান্
বিবস্বানুগ্রসেনশ্চ ব্যাঘ্র আসারণো ভৃগুঃ ।
অনুম্লোচাঃ শংখপালো নভস্যাখ্যং নযংত্যমী ॥
জগন্নির্মাণকর্তারং সর্বদিগ্ব্যাপ্ততেজসম্ ।
নভোগ্রহমহাদীপং বিবস্বংতং নমাম্যহম্ ॥
ত্বষ্টা
ত্বষ্টা ঋচীকতনযঃ কংবলাখ্যস্তিলোত্তমা ।
ব্রহ্মাপেতোঽথ শতজিত্ ধৃতরাষ্ট্র ইষংভরা ॥
ত্বষ্টা শুভায মে ভূযাত্ শিষ্টাবলিনিষেবিতঃ ।
নানাশিল্পকরো নানাধাতুরূপঃ প্রভাকরঃ ।
বিষ্ণুঃ
বিষ্ণুরশ্বতরো রংভা সূর্যবর্চাশ্চ সত্যজিত্ ।
বিশ্বামিত্রো মখাপেত ঊর্জমাসং নযংত্যমী ॥
ভানুমংডলমধ্যস্থং বেদত্রযনিষেবিতম্ ।
গাযত্রীপ্রতিপাদ্যং তং বিষ্ণুং ভক্ত্যা নমাম্যহম্ ॥
অংশুমান্
অথাংশুঃ কশ্যপস্তার্ক্ষ্য ঋতসেনস্তথোর্বশী ।
বিদ্যুচ্ছত্রুর্মহাশংখঃ সহোমাসং নযংত্যমী ॥
সদা বিদ্রাবণরতো জগন্মংগলদীপকঃ ।
মুনীংদ্রনিবহস্তুত্যো ভূতিদোঽংশুর্ভবেন্মম ॥
ভগঃ
ভগঃ স্ফূর্জোঽরিষ্টনেমিঃ ঊর্ণ আযুশ্চ পংচমঃ ।
কর্কোটকঃ পূর্বচিত্তিঃ পৌষমাসং নযংত্যমী ॥
তিথি মাস ঋতূনাং চ বত্সরাঽযনযোরপি ।
ঘটিকানাং চ যঃ কর্তা ভগো ভাগ্যপ্রদোঽস্তু মে ॥
পূষ
পূষা ধনংজযো বাতঃ সুষেণঃ সুরুচিস্তথা ।
ঘৃতাচী গৌতমশ্চেতি তপোমাসং নযংত্যমী ।
পূষা তোষায মে ভূযাত্ সর্বপাপাঽপনোদনাত্ ।
সহস্রকরসংবীতঃ সমস্তাশাংতরাংতরঃ ॥
পর্জন্যঃ
ক্রতুর্বার্চা ভরদ্বাজঃ পর্জন্যঃ সেনজিত্ তথা ।
বিশ্বশ্চৈরাবতশ্চৈব তপস্যাখ্যং নযংত্যমী ॥
প্রপংচং প্রতপন্ ভূযো বৃষ্টিভির্মাদযন্ পুনঃ ।
জগদানংদজনকঃ পর্জন্যঃ পূজ্যতে মযা ॥
ধ্যাযেস্সদা সবিতৃমংডলমধ্যবর্তী
নারাযণস্সরসিজাসন সন্নিবিষ্টঃ।
কেযূরবান্ মকরকুংডলবান্ কিরীটী
হারী হিরণ্মযবপুঃ ধৃতশংখচক্রঃ ॥
