শ্রী লক্ষ্মী নারায়ণ হৃদয় স্তোত্রম্

অথ নারায়ন হৃদয় স্তোত্রম্

অস্য শ্রীনারায়ণহৃদযস্তোত্রমন্ত্রস্য ভার্গব ঋষিঃ, অনুষ্টুপছন্দঃ, শ্রীলক্ষ্মীনারায়ণো দেবতা, ওং বীজং, নমশক্তিঃ, নারায়ণায়েতি কীলকং, শ্রীলক্ষ্মীনারায়ণ প্রীত্যর্থে জপে বিনিয়োগঃ ।

করন্যাসঃ ।
ওং নারায়ণঃ পরং জ্য়োতিরিতি অংগুষ্ঠাভ্য়াং নমঃ ।
নারায়ণঃ পরং ব্রহ্মেতি তর্জনীভ্যাং নমঃ ।
নারায়ণঃ পরো দেব ইতি মধ্যমাভ্যাং নমঃ ।
নারায়ণঃ পরং ধামেতি অনামিকাভ্যাং নমঃ ।
নারায়ণঃ পরো ধর্ম ইতি কনিষ্ঠিকাভ্যাং নমঃ ।
বিশ্বং নারাযণ ইতি করতলকরপৃষ্ঠাভ্যাং নমঃ ।
অঙ্গন্যাসঃ ।
নারায়ণঃ পরং জ্য়োতিরিতি হৃদয়ায় নমঃ ।
নারায়ণঃ পরং ব্রহ্মেতি শিরসে স্বাহা ।
নারায়ণঃ পরো দেব ইতি শিখায়ৈ বৌষট্ ।
নারায়ণঃ পরং ধামেতি কবচায় হুম্ ।
নারায়ণঃ পরো ধর্ম ইতি নেত্রাভ্যাং বৌষট্ ।
বিশ্বং নারায়ণ ইতি অস্ত্রায় ফট্ ।
দিগ্বংধঃ ।
ওং ঐংদ্র্য়াদিদশদিশং ওং নমঃ সুদর্শনায় সহস্রারায় হুং ফট্ বধ্নামি নমশ্চক্রায় স্বাহা । ইতি প্রতিদিশং যোজ্যম্ ।
অথ ধ্যানম্ ।
উদ্যাদাদিত্যসংকাশং পীতবাসং চতুর্ভুজম্ ।
শংখচক্রগদাপাণিং ধ্যায়েল্লক্ষ্মীপতিং হরিম্ ॥ ১ ॥

ত্রৈলোক্যাধারচক্রং তদুপরি কমঠং তত্র চানংতভোগী
তন্মধ্যে ভূমিপদ্মাংকুশশিখরদলং কর্ণিকাভূতমেরুম্ ।
তত্রস্থং শান্তমূর্তিং মণিময়মকুটং কুন্ডলোদ্ভাসিতাংগং
লক্ষ্মীনারায়ণাখ্য়ং সরসিজনয়নং সংততং চিন্তয়ামি ॥ ২ ॥

অথ মূলাষ্টকম্ ।
ওম্ ॥ নারায়ণঃ পরং জ্য়োতিরাত্মা নারায়ণঃ পরঃ ।
নারায়ণঃ পরং ব্রহ্ম নারায়ণ নমোঽস্তু তে ॥ ১॥

নারায়ণঃ পরো দেবো ধাতা নারায়ণঃ পরঃ ।
নারায়ণঃ পরো ধাতা নারায়ণ নমোঽস্তু তে ॥ ২॥

নারায়ণঃ পরং ধাম ধ্যানং নারায়ণঃ পরঃ ।
নারায়ণ পরো ধর্মো নারায়ণ নমোঽস্তু তে ॥ ৩ ॥

নারায়ণঃ পরোবেদ্যঃ বিদ্যা নারায়ণঃ পরঃ ।
বিশ্বং নারায়ণঃ সাক্ষান্নারায়ণ নমোঽস্তু তে ॥ ৪ ॥

নারায়ণাদ্বিধির্জাতো জাতো নারায়ণাদ্ভবঃ ।
জাতো নারায়ণাদিংদ্রো নারায়ণ নমোঽস্তু তে ॥ ৫ ॥

রবির্নারায়ণস্তেজঃ চংদ্রো নারায়ণো মহঃ ।
বহ্নির্নারায়ণঃ সাক্ষান্নারায়ণ নমোঽস্তু তে ॥ ৬ ॥

নারায়ণ উপাস্যঃ স্যাদ্গুরুর্নারায়ণঃ পরঃ ।
নারায়ণঃ পরো বোধো নারায়ণ নমোঽস্তু তে ॥ ৭ ॥

নারায়ণঃ ফলং মুখ্যং সিদ্ধির্নারায়ণঃ সুখম্ ।
সেব্যানারায়ণঃ শুদ্ধো নারায়ণ নমোঽস্তু তে ॥ ৮ ॥ [হরি]

অথ প্রার্থনাদশকম্ ।
নারায়ণ ত্বমেবাসি দহরাখ্য়ে হৃদি স্থিতঃ ।
প্রেরকঃ প্রের্যমাণানাং ত্বয়া প্রেরিতমানসঃ ॥ ৯ ॥

ত্বদাজ্ঞাং শিরসা ধৃত্বা জপামি জনপাবনম্ ।
নানোপাসনমার্গাণাং ভবকৃদ্ভাববোধকঃ ॥ ১০ ॥

ভাবার্থকৃদ্ভবাতীতো ভব সৌখ্যপ্রদো মম ।
ত্বন্মায়ামোহিতং বিশ্বং ত্বয়ৈব পরিকল্পিতম্ ॥ ১১॥

ত্বদধিষ্ঠানমাত্রেণ সা বৈ সর্বার্থকারিণী ।
ত্বমেতাং চ পুরস্কৃত্য সর্বকামান্প্রদর্শয় ॥ ১২ ॥

ন মে ত্বদন্যস্ত্রাতাস্তি ত্বদন্যন্ন হি দৈবতম্ ।
ত্বদন্যং ন হি জানামি পালকং পুণ্যবর্ধনম্ ॥ ১৩ ॥

যাবত্সাংসারিকো ভাবো মনসেস্থা ভাবনাত্মকঃ ।
তাবত্সিদ্ধির্ভবেত্সাধ্য়া সর্বথা সর্বদা বিভো ॥ ১৪ ॥

পাপিনামহমেবাগ্র্য়ো দয়ালূনাং ত্বমগ্রণীঃ ।
দয়নীয়ো মদন্যোঽস্তি তব কোঽত্র জগত্ত্রয়ে ॥ ১৫ ॥

ত্বয়াহং নৈব সৃষ্টশ্চেন্ন স্যাত্তব দয়ালুতা ।
আময়ো বা ন সৃষ্টশ্চেদৌষধস্য বৃথোদয়ঃ ॥ ১৬ ॥

পাপসংঘপরিশ্রাংতঃ পাপাত্মা পাপরূপধৃত্ ।
ত্বদন্যঃ কোঽত্র পাপেভ্যস্ত্রাতাস্তি জগতীতলে ॥ ১৭ ॥

ত্বমেব মাতা চ পিতা ত্বমেব
ত্বমেব বংধুশ্চ সখা ত্বমেব ।
ত্বমেব সেব্যশ্চ গুরুস্ত্বমেব
ত্বমেব সর্বং মম দেব দেব ॥ ১৮ ॥

প্রার্থনাদশকং চৈব মূলাষ্টকমতঃ পরম্ ।
যঃ পঠেচ্ছৃণুয়ান্নিত্য়ং তস্য লক্ষ্মীঃ স্থিরা ভবেত্ ॥ ১৯

নারায়ণস্য হৃদয়ং সর্বাভীষ্টফলপ্রদম্ ।
লক্ষ্মীহৃদয়কং স্তোত্রং যদি চেত্তদ্বিনাকৃতম্ ॥ ২০ ॥

তত্সর্বং নিষ্ফলং প্রোক্তং লক্ষ্মীঃ ক্রুদ্ধ্যতি সর্বদা ।
এতত্সংকলিতং স্তোত্রং সর্বকামফলপ্রদম্ ॥ ২১ ॥

লক্ষ্মীহৃদয়কং চৈব তথা নারায়ণাত্মকম্ ।
জপেদ্যঃ সংকলীকৃত্য সর্বাভীষ্টমবাপ্নুয়াত্ ॥ ২২ ॥

নারায়ণস্য হৃদয়মাদৌ জপ্ত্বা ততঃ পরম্ ।
লক্ষ্মীহৃদয়কং স্তোত্রং জপেন্নারায়ণং পুনঃ ॥ ২৩ ॥

পুনর্নারায়ণং জপ্ত্বা পুনর্লক্ষ্মীনুতিং জপেত্ ।
পুনর্নারায়ণং জাপ্যং সংকলীকরণং ভবেত্ ॥ ২৪ ॥

এবং মধ্যে দ্বিবারেণ জপেত্সংকলিতং তু তত্ ।
লক্ষ্মীহৃদয়কং স্তোত্রং সর্বকামপ্রকাশিতম্ ॥ ২৫ ॥

তদ্বজ্জপাদিকং কুর্য়াদেতত্সংকলিতং শুভম্ ।
সর্বান্মানবাপ্নোতি আধিব্যাধিভয়ং হরেত্ ॥ ২৬ ॥

গোপ্যমেতত্সদা কুর্য়ান্ন সর্বত্র প্রকাশয়েত্ ।
ইতি গুহ্যতমং শাস্ত্রং প্রাপ্তং ব্রহ্মাদিকৈঃ পুরা ॥ ২৭॥

তস্মাত্সর্বপ্রযত্নেন গোপয়েত্সাধয়েসুধীঃ ।
যত্রৈতত্পুস্তকং তিষ্ঠেল্লক্ষ্মীনারায়ণাত্মকম্ ॥ ২৮ ॥

ভূতপৈশাচবেতাল ভয়ং নৈব তু সর্বদা ।
লক্ষ্মীহৃদয়কং প্রোক্তং বিধিনা সাধয়েত্সুধীঃ ॥ ২৯ ॥

ভৃগুবারে চ রাত্রৌ চ পূজয়েত্পুস্তকদ্বয়ম্ ।
সর্বথা সর্বদা সত্যং গোপয়েত্সাধয়েত্সুধীঃ ।
গোপনাত্সাধনাল্লোকে ধন্যো ভবতি তত্ত্বতঃ ॥ ৩০ ॥

ইত্যথর্বরহস্যে উত্তরভাগে নারায়ণহৃদয়ং সংপূর্ণম্ ।

অথ লক্ষ্মী হৃদয় স্তোত্রম্

অস্য শ্রী মহালক্ষ্মীহৃদয়স্তোত্র মহামন্ত্রস্য ভার্গব ঋষিঃ, অনুষ্টুপাদীনি নানাছন্দাংসি, আদ্যাদি শ্রীমহালক্ষ্মীর্দেবতা, শ্রীং বীজং, হ্রীং শক্তিঃ, ঐং কীলকং, আদ্যাদিমহালক্ষ্মী প্রসাদসিদ্ধ্যর্থং জপে বিনিয়োগঃ ॥

ঋষ্যাদিন্যাসঃ –
ওং ভার্গবৃষয়ে নমঃ শিরসি ।
ওং অনুষ্টুপাদিনানাছংদোভ্য়ো নমো মুখে ।
ওং আদ্যাদিশ্রীমহালক্ষ্মী দেবতায়ৈ নমো হৃদয়ে ।
ওং শ্রীং বীজায় নমো গুহ্য়ে ।
ওং হ্রীং শক্তয়ে নমঃ পাদয়োঃ ।
ওং ঐং কীলকায় নমো নাভৌ ।
ওং বিনিয়োগায় নমঃ সর্বাংগে ।

করন্যাসঃ –
ওং শ্রীং অংগুষ্ঠাভ্য়াং নমঃ ।
ওং হ্রীং তর্জনীভ্য়াং নমঃ ।
ওং ঐং মধ্যমাভ্য়াং নমঃ ।
ওং শ্রীং অনামিকাভ্য়াং নমঃ ।
ওং হ্রীং কনিষ্ঠিকাভ্য়াং নমঃ ।
ওং ঐং করতল করপৃষ্ঠাভ্য়াং নমঃ ।

অংগন্য়াসঃ –
ওং শ্রীং হৃদয়ায় নমঃ ।
ওং হ্রীং শিরসে স্বাহা ।
ওং ঐং শিখায়ৈ বষট্ ।
ওং শ্রীং কবচায় হুম্ ।
ওং হ্রীং নেত্রত্রয়ায় বৌষট্ ।
ওং ঐং অস্ত্রায় ফট্ ।
ওং শ্রীং হ্রীং ঐং ইতি দিগ্বংধঃ ।

অথ ধ্যানম্ ।
হস্তদ্বয়েন কমলে ধারয়ংতীং স্বলীলয়া ।
হারনূপুরসংয়ুক্তাং লক্ষ্মীং দেবীং বিচিংতয়ে ॥

কৌশেয়পীতবসনামরবিংদনেত্রাং
পদ্মদ্বয়াভয়বরোদ্যতপদ্মহস্তাম্ ।
উদ্যচ্ছতার্কসদৃশীং পরমাংকসংস্থাং
ধ্যায়েদ্বিধীশনতপাদয়ুগাং জনিত্রীম্ ॥

পীতবস্ত্রাং সুবর্ণাংগীং পদ্মহস্তদ্বায়ান্বিতাম্ ।
লক্ষ্মীং ধ্যাত্বেতি মংত্রেণ স ভবেত্পৃথিবীপতিঃ ॥
মাতুলুংগং গদাং খেটং পাণৌ পাত্রং চ বিভ্রতী ।
নাগং লিংগং চ যোনিং চ বিভ্রতীং চৈব মূর্ধনি ॥

[ ইতি ধ্যাত্বা মানসোপচারৈঃ সংপূজ্য় ।
শংখচক্রগদাহস্তে শুভ্রবর্ণে সুবাসিনী ।
মম দেহি বরং লক্ষ্মীঃ সর্বসিদ্ধিপ্রদায়িনী ।
ইতি সংপ্রার্থ্য় ওং শ্রীং হ্রীং ঐং মহালক্ষ্ম্যৈ কমলধারিণ্যৈ সিংহবাহিন্যৈ স্বাহা ইতি মংত্রং জপ্ত্বা পুনঃ পূর্ববদ্ধৃদয়াদি ষড়ংগন্যাসং কৃত্বা স্তোত্রং পঠেত্ ।]

স্তোত্রম্ ।
বন্দে লক্ষ্মীং পরমশিবময়ীং শুদ্ধজাংবূনদাভাং
তেজোরূপাং কনকবসনাং সর্বভূষোজ্জ্বলাংগীম্ ।
বীজাপূরং কনককলশং হেমপদ্মং দধানা-
-মাদ্যাং শক্তিং সকলজননীং বিষ্ণুবামাংকসংস্থাম্ ॥ ১

শ্রীমত্সৌভাগ্যজননীং স্তৌমি লক্ষ্মীং সনাতনীম্ ।
সর্বকামফলাবাপ্তিসাধনৈকসুখাবহাম্ ॥ ২ ॥

স্মরামি নিত্যং দেবেশি ত্বয়া প্রেরিতমানসঃ ।
ত্বদাজ্ঞাং শিরসা ধৃত্বা ভজামি পরমেশ্বরীম্ ॥ ৩ ॥

সমস্তসংপত্সুখদাং মহাশ্রিয়ং
সমস্তসৌভাগ্যকরীং মহাশ্রিয়ম্ ।
সমস্তকল্যাণকরীং মহাশ্রিয়ং
ভজাম্যহং জ্ঞানকরীং মহাশ্রিয়ম্ ॥ ৪ ॥

বিজ্ঞানসংপত্সুখদাং সনাতনীং
বিচিত্রবাগ্ভূতিকরীং মনোহরাম্ ।
অনংতসংমোদসুখপ্রদায়িনীং
নমাম্যহং ভূতিকরীং হরিপ্রিয়াম্ ॥ ৫ ॥

সমস্তভূতাংতরসংস্থিতা ত্বং
সমস্তভোক্ত্রীশ্বরি বিশ্বরূপে ।
তন্নাস্তি যত্ত্বদ্ব্যতিরিক্তবস্তু
ত্বত্পাদপদ্মং প্রণমাম্যহং শ্রীঃ ॥ ৬ ॥

দারিদ্র্য় দুঃখৌঘতমোপহংত্রী
ত্বত্পাদপদ্মং ময়ি সন্নিধত্স্ব ।
দীনার্তিবিচ্ছেদনহেতুভূতৈঃ
কৃপাকটাক্ষৈরভিষিংচ মাং শ্রীঃ ॥ ৭ ॥

অংব প্রসীদ করুণাসুধয়ার্দ্রদৃষ্টয়া
মাং ত্বত্কৃপাদ্রবিণগেহমিমং কুরুষ্ব ।
আলোকয় প্রণতহৃদ্গতশোকহংত্রী
ত্বত্পাদপদ্ময়ুগলং প্রণমাম্যহং শ্রীঃ ॥ ৮ ॥

শাংত্য়ৈ নমোঽস্তু শরণাগতরক্ষণায়ৈ
কাংত্য়ৈ নমোঽস্তু কমনীয়গুণাশ্রয়ায়ৈ ।
ক্ষাংত্য়ৈ নমোঽস্তু দুরিতক্ষয়কারণায়ৈ
দাত্র্য়ৈ নমোঽস্তু ধনধান্যসমৃদ্ধিদায়ৈ ॥ ৯ ॥

শক্ত্য়ৈ নমোঽস্তু শশিশেখরসংস্তুতায়ৈ
রত্য়ৈ নমোঽস্তু রজনীকরসোদরায়ৈ ।
ভক্ত্য়ৈ নমোঽস্তু ভবসাগরতারকায়ৈ
মত্য়ৈ নমোঽস্তু মধুসূদনবল্লভায়ৈ ॥ ১০ ॥

লক্ষ্ম্যৈ নমোঽস্তু শুভলক্ষণলক্ষিতায়ৈ
সিদ্ধ্য়ৈ নমোঽস্তু শিবসিদ্ধসুপূজিতায়ৈ ।
ধৃত্য়ৈ নমোঽস্ত্বমিতদুর্গতিভংজনায়ৈ
গত্য়ৈ নমোঽস্তু বরসদ্গতিদায়িকায়ৈ ॥ ১১॥

দেব্যৈ নমোঽস্তু দিবি দেবগণার্চিতায়ৈ
ভূত্য়ৈ নমোঽস্তু ভুবনার্তিবিনাশনায়ৈ ।
ধাত্র্য়ৈ নমোঽস্তু ধরণীধরবল্লভায়ৈ
পুষ্ট্যৈ নমোঽস্তু পুরুষোত্তমবল্লভায়ৈ ॥ ১২ ॥

সুতীব্রদারিদ্র্যবিদুঃখহংত্র্য়ৈ
নমোঽস্তু তে সর্বভয়াপহংত্র্য়ৈ ।
শ্রীবিষ্ণুবক্ষঃস্থলসংস্থিতায়ৈ
নমো নমঃ সর্ববিভূতিদায়ৈ ॥ ১৩ ॥

জয়তু জয়তু লক্ষ্মীর্লক্ষণালংকৃতাংগী
জয়তু জয়তু পদ্মা পদ্মসদ্মাভিবংদ্যা ।
জয়তু জয়তু বিদ্যা বিষ্ণুবামাংকসংস্থা
জয়তু জয়তু সম্যক্সর্বসংপত্করী শ্রীঃ ॥ ১৪॥

জয়তু জয়তু দেবী দেবসংঘাভিপূজ্য়া
জয়তু জয়তু ভদ্রা ভার্গবী ভাগ্যরূপা ।
জয়তু জয়তু নিত্যা নির্মলজ্ঞানবেদ্যা
জয়তু জয়তু সত্যা সর্বভূতাংতরস্থা ॥ ১৫ ॥

জয়তু জয়তু রম্যা রত্নগর্ভাংতরস্থা
জয়তু জয়তু শুদ্ধা শুদ্ধজাংবূনদাভা ।
জয়তু জয়তু কাংতা কাংতিমদ্ভাসিতাংগী
জয়তু জয়তু শাংতা শীঘ্রমাগচ্ছ সৌম্যে ॥ ১৬॥

যস্যাঃ কলায়াঃ কমলোদ্ভবাদ্যা
রুদ্রাশ্চ শক্র প্রমুখাশ্চ দেবাঃ ।
জীবংতি সর্বেঽপি সশক্তযস্তে
প্রভুত্বমাপ্তাঃ পরমায়ুষস্তে ॥ ১৭॥

লিলেখ নিটিলে বিধির্মম লিপিং বিসৃজ্যাংতরং
ত্বয়া বিলিখিতব্যমেতদিতি তত্ফলপ্রাপ্তয়ে ।
তদংতরফলেস্ফুটং কমলবাসিনী শ্রীরিমাং
সমর্পয় সমুদ্রিকাং সকলভাগ্যসংসূচিকাম্ ॥ ১৮ ॥

কলয়া তে যথা দেবি জীবংতি সচরাচরাঃ ।
তথা সংপত্করে লক্ষ্মি সর্বদা সংপ্রসীদ মে ॥ ১৯ ॥

যথা বিষ্ণুর্ধ্রুবে নিত্যং স্বকলাং সংন্যবেশয়ত্ ।
তথৈব স্বকলাং লক্ষ্মি ময়ি সম্যক্ সমর্পয় ॥ ২০ ॥

সর্বসৌখ্যপ্রদে দেবি ভক্তানামভয়প্রদে ।
অচলাং কুরু যত্নেন কলাং ময়ি নিবেশিতাম্ ॥ ২১ ॥

মুদাস্তাং মত্ফালে পরমপদলক্ষ্মীঃ স্ফুটকলা
সদা বৈকুংঠশ্রীর্নিবসতু কলা মে নয়নয়োঃ ।
বসেত্সত্য়ে লোকে মম বচসি লক্ষ্মীর্বরকলা
শ্রিয়ঃ শ্বেতদ্বীপে নিবসতু কলা মে স্বকরয়োঃ ॥২২॥

তাবন্নিত্যং মমাংগেষু ক্ষীরাব্ধৌ শ্রীকলা বসেত্ ।
সূর্য়াচংদ্রমসৌ যাবদ্যাবল্লক্ষ্মীপতিঃ শ্রিয়াঃ ॥২৩॥

সর্বমংগলসংপূর্ণা সর্বৈশ্বর্যসমন্বিতা ।
আদ্যাদি শ্রীর্মহালক্ষ্মী ত্বত্কলা ময়ি তিষ্ঠতু ॥২৪॥

অজ্ঞানতিমিরং হংতুং শুদ্ধজ্ঞানপ্রকাশিকা ।
সর্বৈশ্বর্যপ্রদা মেঽস্তু ত্বত্কলা ময়ি সংস্থিতা ॥ ২৫॥

অলক্ষ্মীং হরতু ক্ষিপ্রং তমঃ সূর্যপ্রভা যথা ।
বিতনোতু মম শ্রেয়স্ত্বত্কলা ময়ি সংস্থিতা ॥২৬॥

ঐশ্বর্যমংগলোত্পত্তিস্ত্বত্কলায়াং নিধীয়তে ।
ময়ি তস্মাত্কৃতার্থোঽস্মি পাত্রমস্মি স্থিতেস্তব ॥ ২৭ ॥

ভবদাবেশভাগ্যার্হো ভাগ্যবানস্মি ভার্গবি ।
ত্বত্প্রসাদাত্পবিত্রোঽহং লোকমাতর্নমোঽস্তু তে ॥ ২৮

পুনাসি মাং ত্বত্কলয়ৈব যস্মা-
-দতঃ সমাগচ্ছ মমাগ্রতস্ত্বম্ ।
পরং পদং শ্রীর্ভব সুপ্রসন্না
ময়্যচ্যুতেন প্রবিশাদিলক্ষ্মীঃ ॥ ২৯॥

শ্রীবৈকুংঠস্থিতে লক্ষ্মি সমাগচ্ছ মমাগ্রতঃ ।
নারায়ণেন সহ মাং কৃপাদৃষ্ট্যাঽবলোকয় ॥ ৩০ ॥

সত্যলোকস্থিতে লক্ষ্মি ত্বং মমাগচ্ছ সন্নিধিম্ ।
বাসুদেবেন সহিতা প্রসীদ বরদা ভব ॥ ৩১ ॥

শ্বেতদ্বীপস্থিতে লক্ষ্মি শীঘ্রমাগচ্ছ সুব্রতে ।
বিষ্ণুনা সহিতে দেবি জগন্মাতঃ প্রসীদ মে ॥ ৩২॥

ক্ষীরাংবুধিস্থিতে লক্ষ্মি সমাগচ্ছ সমাধবা ।
ত্বত্কৃপাদৃষ্টিসুধয়া সততং মাং বিলোকয় ॥ ৩৩ ॥

রত্নগর্ভস্থিতে লক্ষ্মি পরিপূর্ণে হিরণ্ময়ে ।
সমাগচ্ছ সমাগচ্ছ স্থিত্বাঽঽশু পুরতো মম ॥ ৩৪॥

স্থিরা ভব মহালক্ষ্মি নিশ্চলা ভব নির্মলে ।
প্রসন্নে কমলে দেবি প্রসন্নহৃদয়া ভব ॥ ৩৫ ॥

শ্রীধরে শ্রীমহাভূতে ত্বদংতঃস্থং মহানিধিম্ ।
শীঘ্রমুদ্ধৃত্য় পুরতঃ প্রদর্শয় সমর্পয় ॥ ৩৬ ॥

বসুংধরে শ্রীবসুধে বসুদোগ্ধ্রি কৃপাময়ে ।
ত্বত্কুক্ষিগতসর্বস্বং শীঘ্রং মে সংপ্রদর্শয় ॥ ৩৭ ॥

বিষ্ণুপ্রিয়ে রত্নগর্ভে সমস্তফলদে শিবে ।
ত্বদ্গর্ভগতহেমাদীন্ সংপ্রদর্শয় দর্শয় ॥ ৩৮ ॥

রসাতলগতে লক্ষ্মি শীঘ্রমাগচ্ছ মে পুরঃ ।
ন জানে পরমং রূপং মাতর্মে সংপ্রদর্শয় ॥ ৩৯ ॥

আবির্ভব মনোবেগাচ্ছীঘ্রমাগচ্ছ মে পুরঃ ।
মা বত্স ভৈরিহেত্য়ুক্ত্বা কামং গৌরিব রক্ষ মাম্ ॥ ৪০

দেবি শীঘ্রং সমাগচ্ছ ধরণীগর্ভসংস্থিতে ।
মাতস্ত্বদ্ভৃত্যভৃত্য়োঽহং মৃগয়ে ত্বাং কুতূহলাত্ ॥ ৪১ ॥

উত্তিষ্ঠ জাগৃহি ত্বং মে সমুত্তিষ্ঠ সুজাগৃহি ।
অক্ষয়ান্ হেমকলশান্ সুবর্ণেন সুপূরিতান্ ॥ ৪২॥

নিক্ষেপান্মে সমাকৃষ্য সমুদ্ধৃত্য মমাগ্রতঃ ।
সমুন্নতাননা ভূত্বা সমাধেহি ধরাংতরাত্ ॥ ৪৩ ॥

মত্সন্নিধিং সমাগচ্ছ মদাহিতকৃপারসাত্ ।
প্রসীদ শ্রেয়সাং দোগ্ধ্রী লক্ষ্মীর্মে নয়নাগ্রতঃ ॥ ৪৪॥

অত্রোপবিশ লক্ষ্মি ত্বং স্থিরা ভব হিরণ্ময়ে ।
সুস্থিরা ভব সংপ্রীত্য়া প্রসীদ বরদা ভব ॥ ৪৫ ॥

আনীতাংস্তু তথা দেবি নিধীন্মে সংপ্রদর্শয় ।
অদ্য ক্ষণেন সহসা দত্ত্বা সংরক্ষ মাং সদা ॥ ৪৬ ॥

ময়ি তিষ্ঠ তথা নিত্যং যথেংদ্রাদিষু তিষ্ঠসি ।
অভয়ং কুরু মে দেবি মহালক্ষ্মীর্নমোঽস্তু তে ॥ ৪৭॥

সমাগচ্ছ মহালক্ষ্মি শুদ্ধজাংবূনদপ্রভে ।
প্রসীদ পুরতঃ স্থিত্বা প্রণতং মাং বিলোকয় ॥ ৪৮॥

লক্ষ্মীর্ভুবং গতা ভাসি যত্র যত্র হিরণ্ময়ী ।
তত্র তত্র স্থিতা ত্বং মে তব রূপং প্রদর্শয় ॥ ৪৯॥

ক্রীড়ংতী বহুধা ভূমৌ পরিপূর্ণকৃপাময়ি ।
মম মূর্ধনি তে হস্তমবিলংবিতমর্পয় ॥ ৫০॥

ফলদ্ভাগ্যোদয়ে লক্ষ্মি সমস্তপুরবাসিনী ।
প্রসীদ মে মহালক্ষ্মি পরিপূর্ণমনোরথে ॥ ৫১॥

অয়োধ্যাদিষু সর্বেষু নগরেষু সমাস্থিতে ।
বৈভবৈর্বিবিধৈর্য়ুক্তৈঃ সমাগচ্ছ মুদান্বিতে ॥ ৫২॥

সমাগচ্ছ সমাগচ্ছ মমাগ্রে ভব সুস্থিরা ।
করুণারসনিষ্যংদনেত্রদ্বয় বিলাসিনী ॥ ৫৩ ॥ [নিষ্পন্ন]

সন্নিধত্স্ব মহালক্ষ্মি ত্বত্পাণিং মম মস্তকে ।
করুণাসুধয়া মাং ত্বমভিষিংচ্য স্থিরং কুরু ॥ ৫৪ ॥

সর্বরাজগৃহে লক্ষ্মি সমাগচ্ছ বলান্বিতে । [মুদান্বিতে]
স্থিত্বাঽঽশু পুরতো মেঽদ্য প্রসাদেনাঽভয়ং কুরু ॥ ৫৫

সাদরং মস্তকে হস্তং মম ত্বং কৃপয়ার্পয় ।
সর্বরাজগৃহে লক্ষ্মি ত্বত্কলা ময়ি তিষ্ঠতু ॥ ৫৬ ॥

আদ্যাদি শ্রীমহালক্ষ্মি বিষ্ণুবামাংকসংস্থিতে ।
প্রত্যক্ষং কুরু মে রূপং রক্ষ মাং শরণাগতম্ ॥ ৫৭ ॥

প্রসীদ মে মহালক্ষ্মি সুপ্রসীদ মহাশিবে ।
অচলা ভব সংপ্রীত্যা সুস্থিরা ভব মদ্গৃহে ॥ ৫৮ ॥

যাবত্তিষ্ঠংতি বেদাশ্চ যাবচ্চংদ্রদিবাকরৌ ।
যাবদ্বিষ্ণুশ্চ যাবত্ত্বং তাবত্কুরু কৃপাং ময়ি ॥ ৫৯ ॥

চাংদ্রীকলা যথা শুক্লে বর্ধতে সা দিনে দিনে ।
তথা দয়া তে ময়্য়েব বর্ধতামভিবর্ধতাম্ ॥ ৬০ ॥

যথা বৈকুংঠনগরে যথা বৈ ক্ষীরসাগরে ।
তথা মদ্ভবনে তিষ্ঠ স্থিরং শ্রীবিষ্ণুনা সহ ॥ ৬১ ॥

যোগিনাং হৃদয়ে নিত্যং যথা তিষ্ঠসি বিষ্ণুনা ।
তথা মদ্ভবনে তিষ্ঠ স্থিরং শ্রীবিষ্ণুনা সহ ॥ ৬২ ॥

নারায়ণস্য হৃদয়ে ভবতী যথাস্তে
নারায়ণোঽপি তব হৃত্কমলে যথাস্তে ।
নারায়ণস্ত্বমপি নিত্যমুভৌ তথৈব
তৌ তিষ্ঠতাং হৃদি মমাপি দয়ান্বিতৌ শ্রীঃ ॥ ৬৩॥

বিজ্ঞানবৃদ্ধিং হৃদয়ে কুরু শ্রীঃ
সৌভাগ্যবৃদ্ধিং কুরু মে গৃহে শ্রীঃ ।
দয়াসুবৃদ্ধিং কুরুতাং ময়ি শ্রীঃ
সুবর্ণবৃদ্ধিং কুরু মে গৃহে শ্রীঃ ॥ ৬৪ ॥

ন মাং ত্যজেথাঃ শ্রিতকল্পবল্লি
সদ্ভক্তচিংতামণিকামধেনো ।
বিশ্বস্য মাতর্ভব সুপ্রসন্না
গৃহে কলত্রেষু চ পুত্রবর্গে ॥ ৬৫ ॥

আদ্যাদিমায়ে ত্বমজাংডবীজং
ত্বমেব সাকারনিরাকৃতিস্ত্বম্ ।
ত্বয়া ধৃতাশ্চাব্জভবাংডসংঘা-
-শ্চিত্রং চরিত্রং তব দেবি বিষ্ণোঃ ॥ ৬৬॥

ব্রহ্মরুদ্রাদয়ো দেবা বেদাশ্চাপি ন শক্নুয়ুঃ ।
মহিমানং তব স্তোতুং মংদোঽহং শক্নুয়াং কথম্ ॥ ৬৭॥

অংব ত্বদ্বত্সবাক্যানি সূক্তাসূক্তানি যানি চ ।
তানি স্বীকুরু সর্বজ্ঞে দয়ালুত্বেন সাদরম্ ॥ ৬৮ ॥

ভবতীং শরণং গত্বা কৃতার্থাঃ স্যুঃ পুরাতনাঃ ।
ইতি সংচিংত্য় মনসা ত্বামহং শরণং ব্রজে ॥ ৬৯ ॥

অনংতা নিত্যসুখিনস্ত্বদ্ভক্তাস্ত্বত্পরায়ণাঃ ।
ইতি বেদপ্রমাণাদ্ধি দেবি ত্বাং শরণং ব্রজে ॥ ৭০ ॥

তব প্রতিজ্ঞা মদ্ভক্তা ন নশ্যংতীত্যপি ক্বচিত্ ।
ইতি সংচিংত্য সংচিংত্য প্রাণান্ সংধারয়াম্যহম্ ॥ ৭১

ত্বদধীনস্ত্বহং মাতস্ত্বত্কৃপা ময়ি বিদ্যতে ।
যাবত্সংপূর্ণকামঃ স্য়াত্তাবদ্দেহি দয়ানিধে ॥ ৭২ ॥

ক্ষণমাত্রং ন শক্নোমি জীবিতুং ত্বত্কৃপাং বিনা ।
ন জীবংতীহ জলজা জলং ত্যক্ত্বা জলগ্রহাঃ ॥ ৭৩ ॥

যথা হি পুত্রবাত্সল্যাজ্জননী প্রস্নুতস্তনী ।
বত্সং ত্বরিতমাগত্য় সংপ্রীণযতি বত্সলা ॥ ৭৪ ॥

যদি স্যাং তব পুত্রোঽহং মাতা ত্বং যদি মামকী ।
দয়াপয়োধরস্তন্যসুধাভিরভিষিংচ মাম্ ॥ ৭৫ ॥

মৃগ্যো ন গুণলেশোঽপি ময়ি দোষৈকমংদিরে ।
পাংসূনাং বৃষ্টিবিংদূনাং দোষাণাং চ ন মে মতিঃ ॥ ৭৬॥

পাপিনামহমেবাগ্র্য়ো দয়ালূনাং ত্বমগ্রণীঃ ।
দযনীয়ো মদন্যোঽস্তি তব কোঽত্র জগত্ত্রয়ে ॥ ৭৭ ॥

বিধিনাহং ন সৃষ্টশ্চেন্ন স্যাত্তব দয়ালুতা ।
আময়ো বা ন সৃষ্টশ্চেদৌষধস্য় বৃথোদয়ঃ ॥ ৭৮ ॥

কৃপা মদগ্রজা কিং তে অহং কিং বা তদগ্রজঃ ।
বিচার্য় দেহি মে বিত্তং তব দেবি দয়ানিধে ॥ ৭৯ ॥

মাতা পিতা ত্বং গুরুসদ্গতিঃ শ্রী-
-স্ত্বমেব সংজীবনহেতুভূতা ।
অন্যং ন মন্যে জগদেকনাথে
ত্বমেব সর্বং মম দেবি সত্য়ে ॥ ৮০ ॥

আদ্যাদিলক্ষ্মীর্ভব সুপ্রসন্না
বিশুদ্ধবিজ্ঞানসুখৈকদোগ্ধ্রী ।
অজ্ঞানহংত্রী ত্রিগুণাতিরিক্তা
প্রজ্ঞাননেত্রী ভব সুপ্রসন্না ॥ ৮১॥

অশেষবাগ্জাড্যমলাপহংত্রী
নবং নবং স্পষ্টসুবাক্প্রদায়িনী ।
মমেহ জিহ্বাগ্র সুরংগনর্তকী [নর্তিনী]
ভব প্রসন্না বদনে চ মে শ্রীঃ ॥ ৮২ ॥

সমস্তসংপত্সুবিরাজমানা
সমস্ততেজশ্চযভাসমানা ।
বিষ্ণুপ্রিয়ে ত্বং ভব দীপ্যমানা
বাগ্দেবতা মে নযনে প্রসন্না ॥ ৮৩॥

সর্বপ্রদর্শে সকলার্থদে ত্বং
প্রভাসুলাবণ্যদয়াপ্রদোগ্ধ্রী ।
সুবর্ণদে ত্বং সুমুখী ভব শ্রী-
-র্হিরণ্ময়ী মে নযনে প্রসন্না ॥ ৮৪ ॥

সর্বার্থদা সর্বজগত্প্রসূতিঃ
সর্বেশ্বরী সর্বভয়াপহংত্রী ।
সর্বোন্নতা ত্বং সুমুখী ভব শ্রী-
-র্হিরণ্ময়ী মে নযনে প্রসন্না ॥ ৮৫ ॥

সমস্তবিঘ্নৌঘবিনাশকারিণী
সমস্তভক্তোদ্ধরণে বিচক্ষণা ।
অনংতসৌভাগ্যসুখপ্রদায়িনী
হিরণ্ময়ী মে নয়নে প্রসন্না ॥ ৮৬ ॥

দেবি প্রসীদ দয়নীয়তমায় মহ্যং
দেবাধিনাথভবদেবগণাভিবংদ্যে ।
মাতস্তথৈব ভব সন্নিহিতা দৃশোর্মে
পত্যা সমং মম মুখে ভব সুপ্রসন্না ॥ ৮৭॥

মা বত্স ভৈরভয়দানকরোঽর্পিতস্তে
মৌলৌ মমেতি ময়ি দীনদয়ানুকংপে ।
মাতঃ সমর্পয় মুদা করুণাকটাক্ষং
মাংগল্যবীজমিহ নঃ সৃজ জন্ম মাতঃ ॥ ৮৮॥

কটাক্ষ ইহ কামধুক্তব মনস্তু চিংতামণিঃ
করঃ সুরতরুঃ সদা নবনিধিস্ত্বমেবেংদিরে ।
ভবে তব দয়ারসো মম রসাযনং চান্বহং
মুখং তব কলানিধির্বিবিধবাংছিতার্থপ্রদম্ ॥ ৮৯ ॥

যথা রসস্পর্শনতোঽয়সোঽপি
সুবর্ণতা স্যাত্কমলে তথা তে ।
কটাক্ষসংস্পর্শনতো জনানা-
-মমংগলানামপি মংগলত্বম্ ॥ ৯০ ॥

দেহীতি নাস্তীতি বচঃ প্রবেশা-
-দ্ভীতো রমে ত্বাং শরণং প্রপদ্য়ে ।
অতঃ সদাঽস্মিন্নভয়প্রদা ত্বং
সহৈব পত্য়া ময়ি সন্নিধেহি ॥ ৯১॥

কল্পদ্রুমেণ মণিনা সহিতা সুরম্যা
শ্রীস্তে কলা ময়ি রসেন রসায়নেন ।
আস্তাং যতো মম শিরঃকরদৃষ্টিপাদ-
-স্পৃষ্টাঃ সুবর্ণবপুষঃ স্থিরজংগমাঃ স্য়ুঃ ॥ ৯২ ॥

আদ্যাদিবিষ্ণোঃ স্থিরধর্মপত্নী
ত্বমেব পত্যা ময়ি সন্নিধেহি ।
আদ্য়াদিলক্ষ্মি ত্বদনুগ্রহেণ
পদে পদে মে নিধিদর্শনং স্য়াত্ ॥ ৯৩ ॥

আদ্যাদিলক্ষ্মীহৃদয়ং পঠেদ্যঃ
স রাজ্যলক্ষ্মীমচলাং তনোতি ।
মহাদরিদ্রোঽপি ভবেদ্ধনাঢ্য়-
-স্তদন্বয়ে শ্রীঃ স্থিরতাং প্রয়াতি ॥ ৯৪ ॥

যস্য স্মরণমাত্রেণ তুষ্টা স্যাদ্বিষ্ণুবল্লভা ।
তস্যাভীষ্টং দদত্যাশু তং পালযতি পুত্রবত্ ॥ ৯৫ ॥

ইদং রহস্যং হৃদয়ং সর্বকামফলপ্রদম্ ।
জপঃ পংচসহস্রং তু পুরশ্চরণমুচ্যতে ॥ ৯৬ ॥

ত্রিকালমেককালং বা নরো ভক্তিসমন্বিতঃ ।
যঃ পঠেচ্ছৃণুয়াদ্বাপি স যাতি পরমাং শ্রিয়ম্ ॥ ৯৭॥

মহালক্ষ্মীং সমুদ্দিশ্য নিশি ভার্গববাসরে ।
ইদং শ্রীহৃদয়ং জপ্ত্বা পংচবারং ধনী ভবেত্ ॥ ৯৮ ॥

অনেন হৃদয়েনান্নং গর্ভিণ্যা অভিমংত্রিতম্ ।
দদাতি তত্কুলে পুত্রো জায়তে শ্রীপতিঃ স্বয়ম্ ॥ ৯৯ ॥

নরেণ বাঽথবা নার্য়া লক্ষ্মীহৃদয়মংত্রিতে ।
জলে পীতে চ তদ্বংশে মংদভাগ্যো ন জায়তে ॥ ১০০॥

য আশ্বিনে মাসি চ শুক্লপক্ষে
রমোত্সবে সন্নিহিতে সুভক্ত্যা ।
পঠেত্তথৈকোত্তরবারবৃদ্ধ্যা
লভেত্স সৌবর্ণময়ীং সুবৃষ্টিম্ ॥ ১০১ ॥

য একভক্তোঽন্বহমেকবর্ষং
বিশুদ্ধধীঃ সপ্ততিবারজাপী ।
স মংদভাগ্যোঽপি রমাকটাক্ষা-
-দ্ভবেত্সহস্রাক্ষশতাধিকশ্রীঃ ॥১০২॥

শ্রীশাংঘ্রিভক্তিং হরিদাসদাস্যং
প্রসন্নমংত্রার্থদৃঢৈকনিষ্ঠাম্ ।
গুরোঃ স্মৃতিং নির্মলবোধবুদ্ধিং
প্রদেহি মাতঃ পরমং পদং শ্রীঃ ॥ ১০৩ ॥

পৃথ্বীপতিত্বং পুরুষোত্তমত্বং
বিভূতিবাসং বিবিধার্থসিদ্ধিম্ ।
সংপূর্ণকীর্তিং বহুবর্ষভোগং
প্রদেহি মে লক্ষ্মি পুনঃ পুনস্ত্বম্ ॥ ১০৪ ॥

বাদার্থসিদ্ধিং বহুলোকবশ্যং
বয়ঃ স্থিরত্বং ললনাসুভোগম্ ।
পৌত্রাদিলব্ধিং সকলার্থসিদ্ধিং
প্রদেহি মে ভার্গবি জন্মজন্মনি ॥ ১০৫ ॥

সুবর্ণবৃদ্ধিং কুরু মে গৃহে শ্রীঃ
সুধান্যবৃদ্ধিং কুরূ মে গৃহে শ্রীঃ ।
কল্য়াণবৃদ্ধিং কুরু মে গৃহে শ্রীঃ
বিভূতিবৃদ্ধিং কুরু মে গৃহে শ্রীঃ ॥ ১০৬॥

ধ্যায়েল্লক্ষ্মীং প্রহসিতমুখীং কোটিবালার্কভাসাং
বিদ্যুদ্বর্ণাংবরবরধরাং ভূষণাঢ্যাং সুশোভাম্ ।
বীজাপূরং সরসিজয়ুগং বিভ্রতীং স্বর্ণপাত্রং
ভর্ত্রায়ুক্তাং মুহুরভয়দাং মহ্যমপ্যচ্যুতশ্রীঃ ॥ ১০৭ ॥

গুহ্যাতিগুহ্যগোপ্ত্রী ত্বং গৃহাণাস্মত্কৃতং জপম্ ।
সিদ্ধির্ভবতু মে দেবি ত্বত্প্রসাদান্ময়ি স্থিতা ॥ ১০৮ ॥

।। ইতি শ্রীঅথর্বণরহস্যে শ্রীলক্ষ্মীহৃদয়স্তোত্রং সংপূর্ণম্ ॥