ভবানি স্তোতুং ত্বাং প্রভবতি চতুর্ভির্ন বদনৈঃ
প্রজানামীশানস্ত্রিপুরমথনঃ পংচভিরপি ।
ন ষদভিঃ সেনানীর্দশশতমুখৈরপ্যহিপতিঃ
তদান্যেষাং কেষাং কথয় কথমস্মিন্নবসরঃ ॥১॥
ঘৃতক্ষীরদ্রাক্ষামধুমধুরিমা কৈরপি পদৈঃ
বিশিষ্যানাখ্যেযো ভবতি রসনামাত্র বিষয়ঃ ।
তথা তে সৌংদর্যং পরমশিবদৃঙ্মাত্রবিষয়ঃ
কথংকারং ব্রূমঃ সকলনিগমাগোচরগুণে ॥২॥
মুখে তে তাংবূলং নয়নযুগলে কজ্জলকলা
ললাটে কাশ্মীরং বিলসতি গলে মৌক্তিকলতা ।
স্ফুরৎকাংচী শাটী পৃথুকটিতটে হাটকময়ী
ভজামি ত্বাং গৌরীং নগপতিকিশোরীমবিরতম্ ॥ ৩ ॥
বিরাজন্মংদারদ্রুমকুসুমহারস্তনতটী
নদদ্বীণানাদশ্রবণবিলসত্কুংডলগুণা
নতাংগী মাতংগী রুচিরগতিভংগী ভগবতী
সতী শংভোরংভোরুহচটুলচক্ষুর্বিজযতে ॥ ৪॥
নবীনার্কভ্রাজন্মণিকনকভূষণপরিকরৈঃ
বৃতাংগী সারংগীরুচিরনযনাংগীকৃতশিবা ।
তডিত্পীতা পীতাংবরললিতমংজীরসুভগা
মমাপর্ণা পূর্ণা নিরবধিসুখৈরস্তু সুমুখী ॥ ৫॥
হিমাদ্রেঃ সংভূতা সুললিতকরৈঃ পল্লবযুতা
সুপুষ্পা মুক্তাভির্ভ্রমরকলিতা চালকভরৈঃ ।
কৃতস্থাণুস্থানা কুচফলনতা সূক্তিসরসা
রুজাং হংত্রী গংত্রী বিলসতি চিদানংদলতিকা ॥ ৬ ॥
সপর্ণামাকীর্ণাং কতিপযগুণৈঃ সাদরমিহ
শ্রযংত্যন্যে বল্লীং মম তু মতিরেবং বিলসতি ।
অপর্ণৈকা সেব্যা জগতি সকলৈর্যত্পরিবৃতঃ
পুরাণোঽপি স্থাণুঃ ফলতি কিল কৈবল্যপদবীম্ ॥ ৭ ॥
বিধাত্রী ধর্মাণাং ত্বমসি সকলাম্নাযজননী
ত্বমর্থানাং মূলং ধনদনমনীযাংঘ্রিকমলে ।
ত্বমাদিঃ কামানাং জননি কৃতকংদর্পবিজযে
সতাং মুক্তের্বীজং ত্বমসি পরমব্রহ্মমহিষী ॥ ৮॥
প্রভূতা ভক্তিস্তে যদপি ন মমালোলমনসঃ
ত্বযা তু শ্রীমত্যা সদযমবলোক্যোঽহমধুনা ।
পযোদঃ পানীযং দিশতি মধুরং চাতকমুখে
ভৃশং শংকে কৈর্বা বিধিভিরনুনীতা মম মতিঃ ॥৯॥
কৃপাপাংগালোকং বিতর তরসা সাধুচরিতে
ন তে যুক্তোপেক্ষা মযি শরণদীক্ষামুপগতে ।
ন চেদিষ্টং দদ্যাদনুপদমহো কল্পলতিকা
বিশেষঃ সামান্যৈঃ কথমিতরবল্লীপরিকরৈঃ ॥১০॥
মহাংতং বিশ্বাসং তব চরণপংকেরুহযুগে
নিধাযান্যন্নৈবাশ্রিতমিহ মযা দৈবতমুমে ।
তথাপি ত্বচ্চেতো যদি মযি ন জায়েত সদয়ং
নিরালংবো লংবোদরজননি কং যামি শরণম্ ॥ ১১॥
অয়ঃ স্পর্শে লগ্নং সপদি লভতে হেমপদবীং
যথা রথ্যাপাথঃ শুচি ভবতি গংগৌঘমিলিতম্ ।
তথা তত্তত্পাপৈরতিমলিনমংতর্মম যদি
ত্বযি প্রেম্ণাসক্তং কথমিব ন জায়েত বিমলম্ ॥ ১২॥
ত্বদন্যস্মাদিচ্ছাবিষযফললাভে ন নিয়মঃ
ত্বমর্থানামিচ্ছাধিকমপি সমর্থা বিতরণে ।
ইতি প্রাহুঃ প্রাংচঃ কমলভবনাদ্যাস্ত্বযি মনঃ
ত্বদাসক্তং নক্তং দিবমুচিতমীশানি কুরু তত্ ॥১৩॥
স্ফুরন্নানারত্নস্ফটিকমযভিত্তিপ্রতিফল
ত্ত্বদাকারং চংচচ্ছশধরকলাসৌধশিখরম্ ।
মুকুংদব্রহ্মেংদ্রপ্রভৃতিপরিবারং বিজয়তে
তবাগারং রম্যং ত্রিভুবনমহারাজগৃহিণি ॥১৪॥
নিবাসঃ কৈলাসে বিধিশতমখাদ্যাঃ স্তুতিকরাঃ
কুটুংবং ত্রৈলোক্যং কৃতকরপুটঃ সিদ্ধিনিকরঃ ।
মহেশঃ প্রাণেশস্তদবনিধরাধীশতনযে
ন তে সৌভাগ্যস্য ক্বচিদপি মনাগস্তি তুলনা ॥১৫॥
বৃষো বৃদ্ধো যানং বিষমশনমাশা নিবসনং
শ্মশানং ক্রীডাভূর্ভুজগনিবহো ভূষণবিধিঃ
সমগ্রা সামগ্রী জগতি বিদিতৈব স্মররিপোঃ
যদেতস্যৈশ্বর্যং তব জননি সৌভাগ্যমহিমা ॥ ১৬॥
অশেষব্রহ্মাংডপ্রলযবিধিনৈসর্গিকমতিঃ
শ্মশানেষ্বাসীনঃ কৃতভসিতলেপঃ পশুপতিঃ ।
দধৌ কংঠে হালাহলমখিলভূগোলকৃপযা
ভবত্যাঃ সংগত্যাঃ ফলমিতি চ কল্যাণি কলয়ে ॥ ১৭ ॥
ত্বদীযং সৌংদর্যং নিরতিশযমালোক্য পরয়া
ভিযৈবাসীদ্গংগা জলমযতনুঃ শৈলতনয়ে ।
তদেতস্যাস্তস্মাদ্বদনকমলং বীক্ষ্য কৃপয়া
প্রতিষ্ঠামাতন্বন্নিজশিরসিবাসেন গিরিশঃ ॥১৮॥
বিশালশ্রীখংডদ্রবমৃগমদাকীর্ণঘুসৃণ
প্রসূনব্যামিশ্রং ভগবতি তবাভ্যংগসলিলম্ ।
সমাদায স্রষ্টা চলিতপদপাংসূন্নিজকরৈঃ
সমাধত্তে সৃষ্টিং বিবুধপুরপংকেরুহদৃশাম্ ॥ ১৯॥
বসংতে সানংদে কুসুমিতলতাভিঃ পরিবৃতে
স্ফুরন্নানাপদ্মে সরসি কলহংসালিসুভগে ।
সখীভিঃ খেলংতীং মলয়পবনাংদোলিতজলে
স্মরেদ্যস্ত্বাং তস্য জ্বরজনিতপীডাপসরতি ॥ ২০॥
॥ ইতি শ্রীমচ্ছংকরাচার্যবিরচিতা আনন্দলহরী সংপূর্ণা ॥
