জয় পদ্মপলাশাক্ষি জয় ত্বং শ্রীপতিপ্রিয়ে ।
জয় মাতর্মহালক্ষ্মি সংসারার্ণবতারিণি ॥১॥
মহালক্ষ্মি নমস্তুভ্যং নমস্তুভ্যং সুরেশ্বরি ।
হরিপ্রিয়ে নমস্তুভ্যং নমস্তুভ্যং দয়ানিধে ॥২॥
পদ্মালয়ে নমস্তুভ্যং নমস্তুভ্যং চ সর্বদে ।
সর্বভূতহিতার্থায় বসুবৃষ্টিং সদা কুরু ॥৩॥
জগন্মাতর্নমস্তুভ্যং নমস্তুভ্যং দয়ানিধে ।
দয়াবতি নমস্তুভ্যং বিশ্বেশ্বরি নমোঽস্তু তে ॥৪॥
নমঃ ক্ষীরার্ণবসুতে নমস্ত্রৈলোক্যধারিণি ।
বসুবৃষ্টে নমস্তুভ্যং রক্ষ মাং শরণাগতম্ ॥৫॥
রক্ষ ত্বং দেবদেবেশি দেবদেবস্য বল্লভে ।
দারিদ্র্য়াত্ত্রাহি মাং লক্ষ্মি কৃপাং কুরু মমোপরি ॥৬॥
নমস্ত্রৈলোক্যজননি নমস্ত্রৈলোক্যপাবনি ।
ব্রহ্মাদয়ো নমংতি ত্বাং জগদানংদদায়িনি ॥৭॥
বিষ্ণুপ্রিয়ে নমস্তুভ্যং নমস্তুভ্যং জগদ্ধিতে ।
আর্তিহংত্রি নমস্তুভ্যং সমৃদ্ধিং কুরু মে সদা ॥৮॥
অব্জবাসে নমস্তুভ্যং চপলায়ৈ নমো নমঃ ।
চংচলায়ৈ নমস্তুভ্যং ললিতায়ৈ নমো নমঃ ॥৯॥
নমঃ প্রদ্যুম্নজননি মাতস্তুভ্যং নমো নমঃ ।
পরিপালয় মাং মাতঃ মাং তুভ্য়ং শরণাগতম্ ॥১০॥
শরণ্যে ত্বাং প্রপন্নোঽস্মি কমলে কমলালয়ে ।
ত্রাহি ত্রাহি মহালক্ষ্মি পরিত্রাণপরায়ণে ॥১১॥
পান্ডিত্যং শোভতে নৈব ন শোভংতে গুণা নরে ।
শীলত্বং নৈব শোভেত মহালক্ষ্মি ত্বয়া বিনা ॥১২॥
তাবদ্বিরাজতে রূপং তাবচ্ছীলং বিরাজতে ।
তাবদ্গুণা নরাণাং চ যাবল্লক্ষ্মীঃ প্রসীদতি ॥১৩॥
লক্ষ্মি ত্বয়াঽলংকৃতমানবা যে
পাপৈর্বিমুক্তা নৃপলোকমান্যাঃ ।
গুণৈর্বিহীনা গুণিনো ভবংতি
দুশ্শীলিনঃ শীলবতাং বরিষ্ঠাঃ ॥১৪॥
লক্ষ্মীর্ভূষয়তে রূপং লক্ষ্মীর্ভূষয়তে কুলম্ ।
লক্ষ্মীর্ভূষয়তে বিদ্যাং সর্বা লক্ষ্মীর্বিশিষ্যতে ॥১৫॥
লক্ষ্মী ত্বদ্গুণকীর্তনেন কমলা ভূর্য়াত্যলং জিহ্মতাম্
রুদ্রাদ্যা রবিচংদ্রদেবপতয়ো বক্তুং চ নৈব ক্ষমাঃ ।
অস্মাভিস্তব রূপলক্ষণগুণান্বক্তুং কথং শক্যতে
মাতর্মাং পরিপাহি বিশ্বজননী কৃত্বা মমেষ্টং ধ্রুবম্ ॥১৬।
দীনার্তিভীতং ভবতাপপীড়িতং
ধনৈর্বিহীনং তব পার্শ্বমাগতম্ ।
কৃপানিধিত্বান্মম লক্ষ্মি সত্বরং
ধনপ্রদানাদ্ধননায়কং কুরু ॥১৭॥
মাং বিলোক্য জননী হরিপ্রিয়ে
নির্ধনং তব সমীপমাগতম্ ।
দেহি মে ঝটিতি লক্ষ্মি করাগ্রং
বস্ত্রকাঞ্চনবরান্নমদ্ভুতম্ ॥১৮॥
ত্বমেব জননী লক্ষ্মীঃ পিতা লক্ষ্মীস্ত্বমেব চ ।
ভ্রাতা ত্বং চ সখা লক্ষ্মীর্বিদ্যা লক্ষ্মীস্ত্বমেব চ ॥১৯॥
ত্রাহি ত্রাহি মহালক্ষ্মি ত্রাহি ত্রাহি সুরেশ্বরি ।
ত্রাহি ত্রাহি জগন্মাতঃ দারিদ্র্য়াত্ত্রাহি বেগতঃ ॥২০॥
নমস্তুভ্যং জগদ্ধাত্রি নমস্তুভ্যং নমো নমঃ ।
ধর্মাধারে নমস্তুভ্যং নমঃ সংপত্তিদায়িনী ॥২১॥
দারিদ্র্য়ার্ণবমগ্নোঽহং নিমগ্নোঽহং রসাতলে ।
মজ্জংতং মাং করে ধৃত্বা তূদ্ধর ত্বং রমে দ্রুতম্ ॥২২॥
কিং লক্ষ্মি বহুনোক্তেন জল্পিতেন পুনঃ পুনঃ ।
অন্যন্মে শরণং নাস্তি সত্যং সত্যং হরিপ্রিয়ে ॥২৩ ॥
এতচ্ছ্রুত্বাঽগস্ত্যবাক্যং হৃষ্যমাণা হরিপ্রিয়া ।
উবাচ মধুরাং বাণীং তুষ্টাঽহং তব সর্বদা ॥২৪॥
শ্রীলক্ষ্মীরুবাচ ।
যত্ত্বয়োক্তমিদং স্তোত্রং যঃ পঠিষ্যতি মানবঃ ।
শৃণোতি চ মহাভাগস্তস্যাহং বশবর্তিনী ॥২৫ ॥
নিত্যং পঠতি যো ভক্ত্য়া ত্বলক্ষ্মীস্তস্য নশ্যতি ।
ঋণং চ নশ্যতে তীব্রং বিয়োগং নৈব পশ্যতি ॥২৬॥
যঃ পঠেত্প্রাতরুত্থায় শ্রদ্ধাভক্তিসমন্বিতঃ ।
গৃহে তস্য সদা তিষ্টেন্নিত্য়ং শ্রীঃ পতিনা সহ ॥২৭ ॥
সুখসৌভাগ্যসংপন্নো মনস্বী বুদ্ধিমান্ভবেত্ ।
পুত্রবান্ গুণবান্ শ্রেষ্ঠো ভোগভোক্তা চ মানবঃ ॥২৮॥
ইদং স্তোত্রং মহাপুণ্যং লক্ষ্ম্যাগস্ত্যপ্রকীর্তিতম্ ।
বিষ্ণুপ্রসাদজননং চতুর্বর্গফলপ্রদম্ ॥২৯ ॥
রাজদ্বারে জয়শ্চৈব শত্রোশ্চৈব পরাজয়ঃ ।
ভূতপ্রেতপিশাচানাং ব্যাঘ্রাণাং ন ভয়ং তথা ॥৩০॥
ন শস্ত্রানলতোয়ৌঘাদ্ভয়ং তস্য প্রজায়তে ।
দুর্বৃত্তানাং চ পাপানাং বহুহানিকরং পরম্ ॥৩১॥
মংদুরাকরিশালাসু গবাং গোষ্ঠে সমাহিতঃ ।
পঠেত্তদ্দোষশাংত্যর্থং মহাপাতকনাশনম্ ॥৩২॥
সর্বসৌখ্যকরং নৄণামায়ুরারোগ্যদং তথা ।
অগস্ত্যমুনিনা প্রোক্তং প্রজানাং হিতকাম্যয়া ॥৩৩॥
।। ইতি অগস্ত্য বিরচিতং শ্রী লক্ষ্মী স্তোত্রম্ ।।
