রণত্ক্ষুদ্রঘংটানিনাদাভিরামং
চলত্তাংডবোদ্দংডবত্পদ্মতালম্ ।
লসত্তুংদিলাংগোপরিব্যালহারং
গণাধীশমীশানসূনুং তমীডে ॥ ১ ॥
ধ্বনিধ্বংসবীণালযোল্লাসিবক্ত্রং
স্ফুরচ্ছুংডদংডোল্লসদ্বীজপূরম্ ।
গলদ্দর্পসৌগংধ্যলোলালিমালং
গণাধীশমীশানসূনুং তমীডে ॥ ২ ॥
প্রকাশজ্জপারক্তরত্নপ্রসূন-
প্রবালপ্রভাতারুণজ্যোতিরেকম্ ।
প্রলংবোদরং বক্রতুংডৈকদংতং
গণাধীশমীশানসূনুং তমীডে ॥ ৩ ॥
বিচিত্রস্ফুরদ্রত্নমালাকিরীটং
কিরীটোল্লসচ্চংদ্ররেখাবিভূষম্ ।
বিভূষৈকভূষং ভবধ্বংসহেতুং
গণাধীশমীশানসূনুং তমীডে ॥ ৪ ॥
উদংচদ্ভুজাবল্লরীদৃশ্যমূলো-
চ্চলদ্ভ্রূলতাবিভ্রমভ্রাজদক্ষম্ ।
মরুত্সুংদরীচামরৈঃ সেব্যমানং
গণাধীশমীশানসূনুং তমীডে ॥ ৫ ॥
স্ফুরন্নিষ্ঠুরালোলপিংগাক্ষিতারং
কৃপাকোমলোদারলীলাবতারম্ ।
কলাবিংদুগং গীযতে যোগিবর্যৈ-
র্গণাধীশমীশানসূনুং তমীডে ॥ ৬ ॥
যমেকাক্ষরং নির্মলং নির্বিকল্পং
গুণাতীতমানংদমাকারশূন্যম্ ।
পরং পারমোংকারমাম্নাযগর্ভং
বদংতি প্রগল্ভং পুরাণং তমীডে ॥ ৭ ॥
চিদানংদসাংদ্রায শাংতায় তুভ্যং
নমো বিশ্বকর্ত্রে চ হর্ত্রে চ তুভ্যম্ ।
নমোঽনংতলীলায কৈবল্যভাসে
নমো বিশ্ববীজ প্রসীদেশসূনো ॥ ৮ ॥
ইমং সুস্তবং প্রাতরুত্থায ভক্ত্যা
পঠেদ্যস্তু মর্ত্যো লভেত্সর্বকামান্ ।
গণেশপ্রসাদেন সিদ্ধ্যংতি বাচো
গণেশে বিভৌ দুর্লভং কিং প্রসন্নে ॥ ৯ ॥
